Beeld: 10 April 2007
"Baasspeurder supt. Piet Byleveld en sy span het ’n “dwelmfabriek”
in die Johannesburgse spogbuurt Northcliff oopgevlek – reg langs
die huis waar ’n 18-jarige vrou enkele dae tevore vermoor is.
’n Moontlike verband tussen dié deurbraak en onlangse
arrestasies in Sunninghill, in die noorde van Johannesburg, en Waterkloof, Pretoria,
word ondersoek.
Veertien vermeende dwelmhandelaars
wat moontlik met nasionale dwelmsindikate met tentakels in Johannesburg, Pretoria,
Durban en Kaapstad verbind kan word, het gister afsonderlik in verskeie Gautengse
howe verskyn.
’n Maande lange ondersoek het Sondagnag uitgeloop op die
klopjag by die beweerde dwelmlaboratorium by ’n huis in Musili’s-rylaan in Northcliff.
Beeld verneem betroubaar dié dwelmhuis is langs die huis
waarin die 18-jarige me. Natasha Snyman verlede week doodgeskiet is. ’n Huiswerker
het op Snyman se lyk, met ’n koeëlwond aan die kop, in haar ouers se slaapkamer
afgekom.
Sewe verdagtes is Sondag in die beweerde dwelmhuis gearresteer.
Supt. Eugene Opperman, polisiewoordvoerder, het gesê hulle
het beslag gelê op dwelms, chemikalieë, buise en ander toerusting wat in die vervaardiging
van dwelms gebruik word. Dit is sowat R500 000 werd.
Die sewe het gister vlugtig in die Johannesburgse landdroshof
verskyn.
Mnre. Paul Goodwin (32), Lourens van Wyk (25), David Nitzan
(37) en Johannes Alant (27), almal van Kaapstad, het saam met mnre. Regaardt Strauss
(37) en Nicholaas Anamoirlis (25) en me. Tracy Muller (37), almal van Johannesburg,
verskyn.
Hul borgtogaansoek is tot volgende week uitgestel. Hulle
staan tereg op aanklagte van die besit, handel en vervaardiging van dwelms.
Terselfdertyd is borgtog in die Randburg-distrikshof aan
vyf ander vermeende dwelmhandelaars toegestaan.
Byleveld se spesiale ondersoekspan het dié drie mans en
twee vroue op 22 Maart by ’n huis in Sunninghill in hegtenis geneem.
Beeld verneem ’n moontlike verband tussen die Sunninghill-
en Northcliff-sake word ondersoek.
Tik (crystals) en cat, asook R20 840 in kontant, is in
die Sunninghill-huis gekonfiskeer.
Mnre. Paulo Costa da Silva (28) en Riaan Carelse (27)
is gister vrygelaat nadat hulle borgtog van onderskeidelik R20 000 en R10 000 betaal
het.
Borgtog van R20 000 elk is toegestaan aan mee. Bianca
Gesualde (25) en Gabriella Grassi (31) en mnr. Rainier van der Vyver (23), ’n ontkleedanser,
maar hulle bly in aanhouding. Dit is omdat nog verwante sake teen hulle hangende
is nadat hulle glo kort ná hul inhegtenisneming met dwelms in die aanhoudingselle
betrap is. Die drie verskyn môre op dié nuwe klagte in die Johannesburgse distrikshof.
Die dwelmsaak teen die vyf is ook weer op vandag se hofrol
geplaas.
Benewens dié klagte verskyn Da Silva en Gesualde vandag
op vroeëre dwelmaanklagte in die Randburg-distrikshof. Hulle was tydens hul arrestasie
elk op R5 000-borgtog uit.
Twee mans van Pretoria, wat ook deur Byleveld se span
aangekeer is, het in die Randburg-landdroshof voorgekom. Ook dié saak word volgens
aanduidings met die Sunninghill- en Northcliff-sake verbind.
Mnre. Jason Demegeze (28) en Paul Kitzman (33) is twee
dae ná mekaar by dieselfde adres in Waterkloof in hegtenis geneem.
Hulle staan onder meer tereg op aanklagte van poging tot
moord, aanranding met die doel om ernstig te beseer en die besit van voorgeskrewe
medisyne (bylae vier en vyf).
Byleveld, ’n gesoute moord-en-roof-speurder, het gister
oor sy betrokkenheid laat val dat hy “sekere aspekte” ondersoek.
Opperman het gesê die moontlikheid word ook ondersoek
dat verskeie uitsmyters by nagklubs in Johannesburg by dwelmhandel, -verspreiding
en -geweld betrokke is.
|